Պատմադիտարանը երկլեզու հրատարակութիւն մըն է՝ նուիրուած հայոց պատմութեան, մշակոյթին եւ ժառանգութեան։ Կը հրատարակենք հետազօտական յօդուածներ, ակնարկներ եւ կարծիքի գրութիւններ, ինչպէս նաեւ կը պահպանենք արխիւային նիւթեր, որոնք կ’օգնեն վաւերագրելու հայ կեանքն ու փորձառութիւնը։ Մեր նպատակն է լուրջ պատմագրութիւնը մատչելի դարձնել լայն հանրութեան եւ քաջալերել խոհուն ու նոր մօտեցումներ։

Պատմադիտարան անունը կու գայ հայերէն «պատմութիւն» եւ «դիտարան» բառերէն։ Պատմադիտարանը կը նկատենք հայոց պատմութեան դիտարան մը՝ վայր մը, ուր կարելի է ուշադրութեամբ դիտել անցեալը, ուսումնասիրել զայն, պահպանել անկէ մնացածը եւ հայոց պատմութիւնը դարձնել աւելի դիւրին՝ զայն ուսումնասիրելու եւ հասկնալու համար։